Vətən müharibəsində Şanlı qələbəmizdən sonra medianın
inkişaf etdirilməsi prioritet məsələlərdən biri kimi diqqət mərkəzində saxlanılır.
Azərbaycan Respublikasının Prezidenti tərəfindən “Azərbaycan Respublikasında
media sahəsində islahatların dərinləşdirilməsi haqqında” Fərmanın imzalanması,
Medianın İnkişafı Agentliyinin yaradılması və “Media haqqında” qanun layihəsinin
hazırlanması barədə tapşırığın verilməsi milli mətbuatımızın inkişafına böyük
töhfələr verəcək. Media haqqında yeni qanun layihəsi dövlətimizin siyasi gücünü özündə təcəssüm
etdirən islahatlardan biri kimi böyük əhəmiyyət kəsb edir. Qanuna milli
informasiyamızın inkişaf etdirilməsi, müasir çağırışlara cavab verməsi üçün
mühüm dəyişikliklər və yeniliklər çoxsaylı jurnalistlərin, ekspertlərin fikirləri
nəzərə alınmaqla qəbul edilmişdir.            Yeni qanun
layihəsinin ən vacib tərəflərindn biri jurnalistə sosial imtiyazları müəyyən
etməsidir. Bununla bərabər, Qanun internet televiziyaları lisenziya almadan fəaliyyətlərini
davam etdirməsinə şərait yaradacaq, jurnalistika peşəsinin ciddi mahiyyət
qazanmasına təkan verəcək, ictimaiyyətdə jurnalistikaya və jurnalistlərə qarşı
formalaşmış neqativ təsəvvürlərin aradan qaldırılmasına təsir edəcək, ictimaiyyət
və media arasında qarşılıqlı etimadın güclənməsini təmin edəcək, media subyektlərinin
sayının müəyyənləşdirilərək Media Reyestrinə daxil ediləcək, Media Reyestrinə
daxil edilmiş jurnalistlərə vahid jurnalist vəsiqəsinin təqdim olunması ilə,
media mühitinin sağlamlaşmasına müsbət təsir göstərəcək, müəlliflik hüququnun
qorunması təmin ediləcəkdir.

 Azərbaycan dövləti mənfur qonşularla həm döyüş
meydanında, həm də informasiya cəbhəsində mübarizə aparır. Bu baxımdan media
sahəsində yeni qanun layihəsinin qəbul edilməsi təqdirəlayiqdir. Milli medianın
inkişaf etdirilməsi həm də Azərbaycan həqiqətlərinin dünya ictimaiyyətinə çatdırılmasına
geniş şərait yaradacaq.

Bir mətbuat işçisi kimi media haqqında yeni qanun
layihəsinin müsbət nəticələr verəcəyinə inanır və dəstəkləyirəm. Eyni zamanda media
haqqında yeni qanun layihəsinin təkmilləşdirilməsində region mətbuatının, o cümlədən Qarabağ
regionunun qəzetlərinin inkişafına dəstək verilməsinin vacibliyini bildirmək istəyirəm. 

Qalib Quliyev,

“Xocalının səsi” qəzetinin redaktoru